Ова е четврта Парада на гордоста, по првата во 2019 година. По поздравните говори во паркот „Жена борец“, учесниците од 19 часот ќе продолжат на протестен марш низ Скопје, а настанот ќе заврши со културно-забавна програма на стадионот на АРМ во Градскиот парк
Паркот „Жена борец“ е почетна точка на учесниците на годинешната Парада на Гордоста, која денеска под мотото „Гласни и горди“ се одржува во Скопје.
Учесниците веќе се собираат во паркот спроти парламентот, додека на местото има силно полициско обезбедување, а на места и метални огради околу паркот.
Организатор на Парадата е Националната мрежа против хомофобија и трансфобија.
Според најавите, официјалниот дел од настанот ќе започне со поздравни говори во паркот, а предвиден е и протестен марш кој од 19 часот ќе започне по скопските улици.
Маршрутата за Парадата е следна: од паркот „Жена-борец“, по улицата Димитрие Чуповски преку Рекорд – улица „Даме Груев“ и булевар „ВМРО“ до крстосницата пред мостот „Гоце Делчев“ – булевар „Илинденска“ покрај Влада – улица Ленинова покрај арена „Тоше Проески“, а крајна дестинација е стадионoт на АРМ, објавија организаторите.
Настанот ќе заврши со културно-забавна програма на стадионот на АРМ во Градскиот парк, која ќе се одвива од 20:30 до 01:00 часот.
Поради безбедносни аспекти, организаторите апелираат заминувањето од Прајдот да е во групи од по неколку луѓе и без видливи обележја како симболи или знамиња.
Инаку, ова е четвртата Парада на гордоста, по првата во 2019 година.
ИЗВОР: 360stepeni.mk
