(ФОТО) Поранешниот потпретседател на САД, а сега противкандидат на Трамп, го посети Зеленски во Киев

Пенс е првиот кандидат за номинација на републиканците за претседателски избори во 2024 година, кој ја посетил Украина. Тој смета дека САД треба да ја поддржуваат украинската страна наспроти неговиот поранешен шеф, а сега противкандидат во партијата Доналд Трамп кој смета дека е потребно да се преиспита американската поддршка

Поранешниот потпретседател Мајк Пенс, кој ја извршуваше функцијата во мандатот на Доналд Трамп, се сретна со украинскиот претседател Володимир Зеленски во Киев за да ѝ даде поддршка на Украина која е нападната од Русија.

Пенс се сретна со Зеленски во претседателската палата и му порача дека САД ќе продолжат да ја поддржуваат Украина „до победа“ во војната, но и потоа до истерување на правдата.

Покрај во главниот град Киев, Пенс бил и во градовите Буча, Ирпин и Мошун кои во текот на руската инвазија беа жестоко гранатирани од Русија. Тој направил обиколка на разурнатите места, се сретнал со локалното население и положил цвеќе на спомениците на загинатите во војната.

„Слободата ќе победи во Украина и сега повеќе од кога и да е мораме да продолжиме да веруваме во храбрите борци овде во Украина кои се борат за слобода и одвраќање на руската агресија“,

им рече Пенс на новинарите.

Посетата на Пенс на Украина доаѓа во период кога тој е во кампања за освојување на номинацијата на републиканската партија за претседателски кандидат на изборите во 2024 година, за што еден од противкандидатите во внатрепартиската трка му е поранешниот шеф Трамп.

Пенс е првиот кандидат од републиканската партија кој во текот на кампањата реши да ја посети Украина, а посетата доаѓа во атмосфера во која републиканците се поделени околу улогата на САД во војната. Поранешниот потпретседател важи за силен застапник на американската поддршка за Украина и смета дека тоа е во најдобар интерес на САД. Ваквиот став на Пенс го става повеќе во корелација со актуелниот претседател Џо Бајден кој најави кандидатура за реизбор и веројатно од редовите на демократите тој ќе се соочи со кандидатот што ќе го изберат републиканците.

Трамп, кој засега води во анкетите во републиканската партија, пак, смета дека треба да се преиспита американската поддршка за Украина. Сличен став како него има уште еден од кандидатите за номинација на републиканската партија, гувернерот на Флорида Рон Десантис, кој е второпласиран во анкетите додека Пенс засега е на третата позиција.