На фотографиите објавени на фејсбук-профилот на премиерот се гледа дека со Димитар Ковачевски на иста маса седат поранешниот лидер на СДСМ и премиер, Зоран Заев, и министерот за внатрешни работи, Оливер Спасовски, што би требало да биде демант на информациите во јавноста дека оваа тројка не е во добри меѓусебни односи
Премиерот Димитар Ковачевски вечерва на својот фејсбук-профил објави фотографии од „координативен состанок на стратешкиот тим за европскиот пат“.
На фотографиите се гледа дека со Ковачевски на иста маса седат поранешниот лидер на СДСМ и премиер, Зоран Заев, и министерот за внатрешни работи, Оливер Спасовски, што би требало да биде демант на информациите во јавноста дека оваа тројка не е во добри меѓусебни односи.
На состанокот, според фотографиите, присуствуваат и генералниот секретар на партијата, Миле Зечевиќ, професорот на Економскиот факултет и поранешен пратеник и партиски функционер, Игор Ивановски – Шема, шефот на кабинет на премиерот Мартин Попов, како и организациски секретар во СДСМ, Митко Трајчулески.
Ковачевски во објавата вели дека СДСМ има долгогодишно државничко и партиско искуство, посветеност и полна енергија да продолжи со победа и брз чекор по европскиот пат.
„Денешниот координативен состанок на стратешкиот тим е во оваа насока – да направиме сè, да овозможиме целосен државен и национален консензус за исполнување на определбата на огромното мнозинство граѓани, да станеме полноправна европска држава до 2030 година“,
пишува Ковачевски.
Тој додава дека европскиот пат и полноправното членство во ЕУ се највисок државен и национален, македонски приоритет.
„Ова е клучен момент, се работи за сегашноста, стабилноста и извесната иднина на сите наши граѓани, за иднината на денешните и идните генерации. Граѓаните заслужуваат европски квалитет на живот и европски животен стандард, во европска држава, а тоа да биде нивната родна земја, нивната татковина“,
додава Ковачевски во објавата.
ИЗВОР: 360stepeni.mk
