Скопјани кои сакаат нивните деца да доживеат новогодишна магија и да уживаат во украсите и светилките својствени за овој дел од годината, ќе мора своите деца да ги однесат на прошетки во други градови. Затоа што се чини дека од сите градови во Македонија, само главниот ќе остане во мрак.
Градоначалниците на другите градови изминативе денови се фатија за работа. Блеснаа главните улици и плоштадите, светна новогодишната елка, се создаде празнична атмосфера….
Битола го означи почетокот на празничната сезона со свечено палење на новогодишните светилки, претворајќи го градот во вистинска зимска бајка. Од Широк Сокак и плоштадот Магнолија, до Офицерскиот дом, парковите кај Саат кулата и Старата чаршија – секој агол зрачи со празнична магија.
На 20 декември започнува празничниот фестивал „Зимска приказна“, кој оваа година ќе трае сѐ до 6 јануари – подолго од кога било досега. Но, магијата веќе започна!
Со свеченото палење на празничните светилки, Битола се претвори во вистинска зимска бајка. Блесна во празничен сјај, најавувајќи го духот на радоста и заедништвото што не очекува, посочија од општината.
Крива Паланка сосема заслужено се оценува како „најубаво украсен град“. Поставени се светлосни завеси, ѕвездено небо, две елки со висина од 10 метри и бројни други новогодишни украси. Акцентот е ставен на Градскиот плоштад и општинската зграда, каде има атрактивни и светлечки новогодишни украси, а граѓаните и посетителите ги користат за да направат новогодишни фотографии за спомен и да го доловат празничното доживување.
Крива Паланка блесна – раскошно накитена и украсена – сјае во празничен декор од илјадници светилки и ја носи празничната магија во срцата на паланчани, истакна градоначалникот.
Градоначалникот на Штип, Иван Јорданов, објави видео кое ја покажува новогодишната магија што завладеа во градот.
Штипјани од сите генерации, но и посетителите, токму овде ќе ужуваат во прекрасна новогодишна атмосфера.
И во Велес се чувствува новогодишната магија.
-Безброј светилки наоколу ни ја донесоа празничната бајка дома, во нашиот Велес. Но, ова е само почеток – украсувањето ќе продолжи и во наредните денови за уште поубава приказна! Велес – наша најубава новогодишна бајка, посочи градоначалникот Марко Колев.
ИЗВОР: kurir.mk
