(ФОТО) Атина под полициска блокада, сè уште трае потрагата по убиецот на грчкиот навивач

Грчката полиција вчера ги приведе учесниците во нередите во Атина во пресрет на натпреварот АЕК – Динамо Загреб што требаше да се игра во понеделникот. Уапсените утринава се изведени пред обвинител, а против 104 лица се поднесени кривични пријави. Во тек е лабораториско истражување на ДНК и други докази за откривање на сторителот на убиството на 29-годишниот млад човек, навивач на АЕК

Истрагата за нередите во Атина е сè уште во тек, како и потрагата по оружјето со кое беше прободен починатиот навивач на грчкиот клуб АЕК, објави „хрт.хр“.

Како што јави телевизијата, полицијата трага и по останатите демонстранти. Главното прашање е кој е директно одговорен за убиството и таму ќе биде најстрога казната.

Против 104 лица се поднесени кривични пријави за убиство со умисла, учество во злосторничка организација, експлозија, поседување распрскувачки материи.

Делата за кои се товарат се нарушување на јавниот ред и мир, нанесување и обиди за нанесување тешки телесни повреди, уништување туѓ имот, поткуп, недозволено носење оружје, употреба на оружје, поседување факели.

Бидејќи оружјето со кое е убиен 29-годишниот грчки навивач Михалис Кацурис сè уште не е пронајдено, кривичното дело убиство не е персонифицирано. Во моментов се испитува генетски материјал пронајден на метални предмети и дрвени палки во обид да се идентификува сторителот.

Истрагите се одвиваат во неколку правци, а надлежните им ги одзеле сите мобилни телефони на уапсените и ги вештачат за можни докази.