Претседателката на ЕК ја испрати пораката преку објава на Твитер, а доаѓа по нејзината средба со премиерот Димитар Ковачевски вчера во Атина
Ковачевски во интервју за МИА од Атина, исто така, се осврнува на средбата со Фон дер Лајен велејќи дека и двајцата изразиле задоволство што процесот на уставните измени започна успешно во македонскиот парламент и надеж дека пратениците во Собранието ќе имаат визија и храброст да донесат важна одлука за продолжување на на европската интеграција на земјава
Претседателката на Европската комисија Урсула фон дер Лајен, во објава на својот твитер-профил, денеска изрази надеж дека сите партии во македонскиот парламент ќе ги поддржат уставните измени и патот на земјата кон Европската Унија.
Објавата на претседателката на ЕК доаѓа е во контекст на нејзината средба со премиерот Димитар Ковачевски одржана вчера во Атина, а на маргините на неформалната вечера што по повод 20-годишнината од Декларацијата од Солун од Самитот ЕУ – Западен Балкан која ја организираше грчкиот премиер Кирјакос Мицотакис.
„Добра размена на мислења со премиерот Димитар Ковачевски. Го поздравив поднесувањето на уставните амандмани од неговата влада во парламентот. Се надевам дека сите партии ќе ги поддржат, за придвижување на европскиот пат на Северна Македонија. Северна Македонија припаѓа во ЕУ“,
напиша Фон дер Лајен на Твитер.
Good exchange with PM @DKovachevski.
I welcomed his government’s tabling of the Constitutional amendments in Parliament. I hope all parties will support it, to move forward on North Macedonia’s European path.
North Macedonia belongs in the EU. pic.twitter.com/pH2LMcjZCO
— Ursula von der Leyen (@vonderleyen) August 21, 2023
На средбата со претседателката на ЕК се осврна и премиерот Димитар Ковачевски во интервју за новинската агенција МИА објавено денеска. Во него тој вели дека со Фон дер Лајен разговарале за неколку значајни теми. Првата, како што потенцира, се однесувала на уставните измени.
„Првата тема беа секако уставните измени кои веќе се наоѓаат во собраниска процедура и за кои изразивме и двајцата задоволство што процесот започна. Процесот започна успешно и се надевам, исто како што и Европската Унија се надева дека во нашето Собрание ќе има визија, ќе има храброст, пратениците да донесат една важна одлука која се однесува на продолжување на европската интеграција на Северна Македонија“,
вели Ковачевски за државната новинска агенција.
Друга тема на која разговарале, а ја истакнува Ковачевски, е планот за развој на Западен Балкан.
„Знаете дека станува збор за план кој беше промовиран лично од претседателската на Европската комисија, а потоа и во детали разговаран во Тирана заедно со еврокомесарот за проширување г. Вархеји и којшто се однесува на зголемување на финансиските средства за финансирање на регионални проекти во земјите од Западен Балкан, зголемување пред се на економската соработка помеѓу земјите и забрзување на процесот на интеграција во ЕУ“,
вели премиерот.
Во рамките на овој процес, Ковачевски најавува серија состаноци, меѓу кои и посета на Фон дер Лајен на земјава и негова посета на Брисел.
ИЗВОР: 360stepeni.mk
