Треба да размислуваме како да го постигнеме тоа Европа да биде целосна, овие држави да станат дел од ЕУ, рече претседателката на ЕК
Невозможно е да се замисли ЕУ без Западен Балкан, смета претседателката на Европската комисија (ЕК) Урсула фон дер Лајен.
По повод преземањето на претседателството на Шпанија со Советот на Европа, таа денеска во Мадрид одржа заедничка прес-конференција со шпанскиот премиер Педро Санчез, каде одговарајќи на новинарско прашање поврзано со членството на Украина во ЕУ порача дека Унијата не може да се замисли без оваа и без земјите од Западен Балкан.
„Ајде да размислиме за иднината, да погледнеме напред неколку години, да размислиме каква ќе биде Европа. Мислите ли дека Европа ќе постои без Украина, Молдавија, без Западен Балкан и сите делови од Европа кои се под влијание на Русија и Кина? Тоа е невозможно. Треба да размислуваме како да го постигнеме тоа Европа да биде целосна, овие држави да станат дел од ЕУ“,
рече фон дер Лајен.
Проширувањето на ЕУ е на маса, порача и премиерот на Шпанија, Педро Санчез. И тој вели дека најважното прашање е како се гледа Европа наредните години, кои се целите и стратегиите за следните четири до десет години и според него, ЕУ треба повеќе да се федерализира, да има повеќе суверенитет да се пронајдат заеднички одговори на отворени прашања.
Во фокусот на обраќањата и на претседателката на ЕК и на шпанскиот премиер беше ситуацијата во Украина и пораките дека е потребна поддршка за украинската страна и стабилизација. Токму со посета на Киев во саботата на 1 јули, Санчез го започна и претседавањето на Шпанија.
По Шпанија, следна земја претседавач ќе биде Белгија во првата половина на 2024, и Унгарија во втората половина на 2024 година.
Извор: 360stepeni.mk
