Казните за сообраќајни прекршоци во Финска се одредуваат според тежината на прекршокот и приходите на сторителот, а нив полицијата може веднаш да ги виде преку паметните телефони со кои располага, а кои се поврзани со централната база на податоци за даночните обврзници
Финскиот мултимилионер Андрес Виклеф добил казна од 121 000 за брзо возење бидејќи ја пречекорил дозволената брзина на движење за 30 километри на час. Во Финска казните се одредуваат прогресивно, според приходите на престапникот.
Во изјава за „Ниа Аланд“, весник од Оландските Острови, автономен фински регион во Балтичкото Море, бизнисменот изјавил дека ја намалувал брзината на движење, но претпоставува дека тоа не се случило доволно бргу.
„Така оди тоа“,
рекол Виклеф.
Бизнисменот, кој е претседател и основач на холдинг компанија, чии приходи изнесуваат 250 милиони евра годишно, исто така изјавил дека ограничувањето на брзината на движење каде што го направил прекршок ненадејно се променило од 70 на 50 километри на час. Во тој момент, тој возел со 82.
Во изјавата Виклеф вели и дека се надева оти парите што ги платил за казната ќе бидат потрошени корисно.
„Слушнав дека владата сака да заштеди 1,5 милијарди евра во здравството во Финска, така што се надевам дека моите пари можат да пополнат дел од празнината“,
рекол Виклеф.
Казните за сообраќајни прекршоци во Финска се одредуваат според тежината на прекршокот и приходите на сторителот, а нив полицијата може веднаш да ги виде преку паметните телефони со кои располага, а кои се поврзани со централната база на податоци за даночните обврзници.
Според финскиот систем, паричната казна се пресметува врз основа на дневниот приход на престапникот и врз основа на тоа за колку е пречекорена дозволената брзина на движење.
Се гледаат и отежнувачки и олеснителни околности, а во случајот на Виклеф отежнувачки е тоа што тој претходно двапати бил казнет за брзо возење. Покрај паричната казна, одземена му е и возачката на 10 дена.
Претходните две казни за финскиот бизнисмен изнесувале 63 680 евра, која е изречена во 2018 година, и 95 000 евра, која ја добил пред повеќе години.
Извор: 360stepeni.mk
