ЏИБУТИ (АА) – Турскиот министер за надворешни работи Хакан Фидан денес ја повтори посветеноста на Туркије за поттикнување силно партнерство со африканските земји, известува Анадолу.
Министерот Фидан одржа говор на третата министерска конференција како дел од партнерството меѓу Туркије и Африка во западноафриканската земја Џибути.
Турскиот министер ја истакна важноста на младото население во Африка, но и огромните ресурси и растечкиот пазар на континентот, додавајќи дека Африка мора да преземе „поголема улога“ во 21 век.
Фидан потсети и на многуте предизвици со кои се соочува Африка, вклучително и тероризмот, нееднаквоста, негативните ефекти од климатските промени и нерегуларната миграција.
Шефот на турската дипломатија ја нагласи посветеноста на Анкара за „африкански решенија за африканските проблеми“.
Осврнувајќи се на безбедносните проблеми, Фидан ја истакна поддршката на африканските земји во борбата против тероризмот и стабилизација на регионите погодени од конфликти.
Фидан особено ја нагласи важноста на растечката трговска размена на Туркије со Африка, која во 2023 година надмина 35 милијарди долари, додавајќи дека турските инвестиции во африканските земји изнесуваат околу 7 милијарди долари.
Турскиот министер ја пофали и поддршката на африканските земји за Палестина и ја истакна важноста на африканските гласови на глобалните платформи, како што е Г20.
Туркије, како стратешки партнер на Африканската унија од 2008 година, работи на развивање билатерални односи со африканските земји преку структуриран и приспособен пристап.
Извор: Anadolu Agency (AA)
