Турскиот фудбалски тим Фенербахче поднесе тужба против ривалот Галатасарај за „напад врз личните права“ на тренерот Жозе Мурињо.
Галатасарај го обвини Мурињо за расистички коментари по дербито во Истанбул во понеделникот, велејќи дека користел „недвосмислена дискриминаторска реторика“ откако рекол дека клупата на Галатасарај „скокала наоколу како мајмуни“.
Фенербахче го отфрли обвинението и рече дека коментарите се „намерно извадени целосно од контекст и искривени на погрешен начин“. Клубот поднесе тужба за околу 52.000 долари за морална штета.
-Би сакале да ја информираме јавноста дека против Галатасарај адвокатите на Фенербахче поднеле тужба за морална отштета од 1 милион 907 илјади турски лири поради напад на личните права на нашиот тренер Жозе Мурињо, се вели во соопштението.
Се чини дека бројот е референца за Фенербахче, основан во 1907 година, број што е на грбот на клубот.
Галатасарај оваа недела соопшти дека Мурињо „упорно дава погрдни изјави насочени кон турскиот народ“ и има намера да отвори кривична постапка во врска со „расистичките изјави“ дадени од португалскиот тренер. Турската фудбалска федерација во четвртокот го суспендираше Мурињо на четири натпревари и го казни со 1,6 милиони турски лири (44.000 долари) поради коментарите за турските судии по натпреварот со Галатасарај.
На прес-конференцијата по натпреварот, Мурињо ја поздрави одлуката да се назначи странски судија за натпреварот – Словенецот Славко Винчичиќ – и исто така го пофали судијата за неговото „одлично судење“.
Мурињо рече дека отишол да го види судијата и да му се заблагодари по натпреварот. Кога го виде четвртиот судија – турски судија – Мурињо му рече: „Ти да беше судија, ќе беше катастрофа“. (МИА)
Извор: kurir.mk
