Падот на Башир ал Асад ги доведе во неизвесност сириските бегалци во Европа. Неколку држави го покренаа прашањето за идниот статус на Сиријците кои во изминативе 13 години, за време на граѓанската војна во Сирија, добиваа азил и дозволи за времен престој во земјите членки на Унијата.
Германија, Белгија, Данска и Холандија најавија дека ќе ги стопираат барањата за азил поднесени од сириските државјани, од Елисејската палата велат дека работат на суспензија на тековните барања за азил, додека пак Грција во петок ќе одлучи за статусот на околу 9.000 сириски бегалци кои престојуваат во земјата. Австриската влада веќе најави дека ќе настојуваат сите бегалци кои доаѓаат од Сирија, да се вратат во матичната држава..
„Му наложив на Министерството да подготви програма за нивно враќање и депортација во Сирија. Ја следимe ситуацијата во Сирија која од час во час се менува и ќе видиме како тоа ќе влијае врз конечната одлука. Во моментов имаме речиси 13 000 барања за азил.“ – Герхард Карнер министер за внатрешни работи на Австрија.
Организациите за заштита на правата и за помош на бегалците предупредуваат дека ваквите одлуки се избрзани, напоменувајќи дека во делови од Сирија и натаму се водат борби меѓу ривалските групи. Неизвесна е и политичката стабилност во земјата. Дамаск е под контрола на Организацијата за ослободување на Левантот, која е формирана во 2017 година како огранок на Ал Каеда во Сирија и Либан. Иако, групата во последниве години се дистанцираше од Ал Каеда, и натаму се на листата на терористички организации на ЕУ, САД и Велика Британија.
„Имајќи ја предвид значителна неизвесност и загриженост околу транзицијата во Сирија и нејзината иднина, ги повикуваме сите земји каде Сиријците престојуваат како бегалци да го поддржат правото на азил, како и принципот на безбедно и доброволно враќање. Останува да видиме дали оваа нова реалност ќе им овозможи на Сиријците да ги обноват животите или пред нив претстои уште потешка криза.“ – Меѓународен комитет за спасување.
Од Европската Унија пак велат дека во моментов, немаат никаков контакт со групата која се преставува како нова власт во Сирија.
„Како што групата презема поголема одговорност, ќе треба да ги процениме не само нивните зборови, туку и нивните дела. Во моментов не се занимаваме со нив или со нејзините водачи.“ – Ануар Ел Ануни – Портпарол на Европската комисија за надворешни работи и безбедносна политика.
Во голема офанзива која траше помалку од 10 дена, Сириските бунтовници презедоа контрола врз Дамаск и ставија крај на неколку децениското владеење на семејството Асад, кое управуваше со државата од 1970 година. После бунтот против Башар ал Асад, кој почна во 2011 година и кој доведе до граѓанска војна во земјата, речиси 4,5 милиони Сиријци се упатија кон земјите членки на Унијата, каде добија статус на бегалци. Според проценките на хуманитарните организации, во 13-годишната крвава граѓанска војна во Сирија, загинаа околу 600.000 лица.
Извор: 24vesti.mk
