Се вжештува атмосферата во Европската Унија – Унгарија ќе биде лишена од должноста да биде домаќин на состанокот на ЕУ во август.
По средбата на шефовите на дипломатии во Брисел, Жосеп Борел порача дека Унгарија треба да сноси последици и испрати остри критики до унгарскиот премиер Виктор Орбан, за средбите со Путин и Џинпинг, кои самиот Орбан ги нарече „мировна мисија“.
– 25 земји членки ги критикуваа потезите на Унгарија. Исто така и со одговрностите за ротирачкото претседателство. И скоро сите земји – членки инсистираа на потребата да се задржи единството. Јас потсетив на должноста за лојалност според членот 24, точка 3, од договорот на Европската Унија, кој не служи за украс. Тоа не се празни зборови. Вистина е, земјата – членка има суверено право на надворешна политика, но се додека се членки на овој клуб, мора да ги почитуваат договорите, а особено овој член. – изјави Борел.
Состаноците на министрите на ЕУ, според агендата треба да се случат од 28 до 30 август, но сега наместо во Будимпешта, ќе бидат во Брисел. За Унгарија, ваквата одлука на Борел е „комплетно детска“, а унгарскиот министер за надворешни работи, Петер Сијарто, на Фејсбук порача:
– Каков фантастичен одговор смислија. Не сакам никому да ги повредам чувствата, ама се чувствувам како да сме во градинка. – напиша на фејсбук Питер Сијарто од МНР на Унгарија.
Инаку, секои шест месеци, се организираат состаноци на министрите за надворешни и министрите за одбрана во земјата претседавач. Унгарија претседава со ЕУ од 1ви јули, па се до крајот на 2024та.
Извор: 24vesti.mk
