АНКАРА (АА) – Сите 85 милиони турски граѓани заедно ќе го градат „Столетието на Туркије“, истакна турскиот претседател Реџеп Таип Ердоган, јавува Анадолу.
„Ќе имплементираме два концепта – стабилност и доверба. Ќе го градиме Столетието на Туркије со стабилност и доверба“, рече Ердоган по првиот состанок на неговиот нов Кабинет во главниот град Анкара.
Во Туркије на 28 мај се одржа втор круг претседателски избори, откако ниту еден кандидат не обезбеди повеќе од 50 отсто гласови потребни за победа во првиот круг што се одржа на 14 мај.
Ердоган победи на изборите со освоени 52,18 отсто од гласовите, додека опозицискиот кандидат Кемал Киличдароглу освои 47,82 отсто, според официјалните резултати.
Турскиот претседател во саботата го претстави својот нов Кабинет по инаугурацијата во Анкара.
„На овие избори, сите во Туркије победија со нас и со нашиот сојуз. Без оглед на нивните политички преференции, секој од 85-те милиони победи“, рече Ердоган.
Тој истакна дека нацијата ја сочува својата волја и иднината со рекордното учество и на изборите на 14 и на 28 мај, и додаде дека турската демократија стана референтна точка за светот.
Ердоган нагласи дека ќе продолжи да работи за земјата без да исклучува ниеден граѓанин.
Извор: www.aa.com.tr
