ИСТАНБУЛ (АА) – Турскиот претседател Реџеп Таип Ердоган денес изјави дека Туркије без сомнение дала најсилен одговор на злосторствата на Израел во Палестина, како што е прекинот на трговијата, јавува Анадолу.
Анкара ја прекина целата трговија со Израел во мај, наведувајќи ја хуманитарната трагедија во Газа, каде што Израел уби повеќе од 43.000 Палестинци од октомври минатата година.
„Сѐ додека продолжуваат испораките на оружје, Израел ќе биде поагресивен. Секој ден во кој Израел нема да биде запрен, ќе се влошува ситуацијата во Палестина и Либан“, изјави Ердоган за новинарите во претседателскиот авион на враќањето од посетите на Ријад и Баку.
Говорејќи за прашањето за можното помирување со Сирија, турскиот претседател рече дека Туркије „подала рака“ за нормализација на односите, изразувајќи уверување дека тоа ќе ја отвори вратата за мир и стабилност во Сирија.
Претседателот Ердоган изјави дека прекуграничните операции секогаш се опција за безбедноста на Туркије, изразувајќи подготвеност за започнување операции во секое време, доколку се почувствуваат загрозени.
Ердоган, исто така, истакна дека „заканата на Израел“, веднаш до Сирија, не е бајка, предупредувајќи дека огнот во околните области може брзо да се прошири во нестабилните земји.
Во врска со новата администрација во САД, Ердоган изрази надеж дека новоизбраниот претседател Доналд Трамп ќе преземе различни чекори за регионот во периодот што следи.
Извор: Anadolu Agency (AA)
