ИСТАНБУЛ/АНКАРА (АА) – Турскиот претседател Реџеп Таип Ердоган денес истакна дека Соединетите Американски Држави (САД) ги користат терористичките организации на Блискиот Исток за безбедноста на Израел, јавува Анадолу.
„Сега е познат факт дека САД ги користат терористичките организации во регионот за свои сопствени интереси и за безбедноста на Израел“, им рече Ердоган на новинарите во претседателскиот авион на враќање од Русија по Самитот на БРИКС.
Тој рече дека Туркије покренала иницијатива во рамките на Обединетите нации (ОН) за воведување сеопфатно ембарго за оружје врз Израел бидејќи интензивираните израелски напади врз Газа и Либан продолжуваат да одземаат стотици животи секој ден.
Ердоган нагласи дека расте бројот на земји што го поддржуваат повикот на Анкара за ембарго за оружје за Израел.
„Се надеваме дека ќе успееме во ова како ‘Сојуз на човештвото’ и ќе ја отвориме вратата за траен мир“, додаде тој.
За терористичкиот напад на ПКК врз седиштето на Турската воздухопловна и вселенска индустрија (ТУСАШ) во главниот град Анкара, во кој загинаа пет лица, а 22 се повредени, тој истакна дека Туркије продолжува со напорите за „целосно исушување на тероризмот на неговиот извор“.
По нападот, турската војска и разузнавачката агенција започнаа воздушни напади врз позиции на ПКК/ЈПГ во Северен Ирак и во Сирија.
„Терористите се марионети. Наша цел е Туркије без тероризам“, рече Ердоган и додаде: „Нема да правиме компромиси за ова.“
„ПЈД/ЈПГ, сирискиот огранок на терористичката организација ПКК, е предодреден да биде напуштен, оставен изолиран“, додаде тој.
Терористичката организација што „ја експлоатира нестабилноста во Сирија ги троши своите напори барајќи заштита кај одредени западни земји“, додаде тој.
Во својата 40-годишна терористичка кампања против Туркије, ПКК, која е ставена на листата на терористички организации од страна на Туркије, Соединетите Американски Држави и Европската Унија, е одговорна за смртта на над 40.000 луѓе, меѓу кои и жени и деца.
Извор: Anadolu Agency (AA)
