АНКАРА (АА) – Зад растечката агресија на Израел стои очигледен обид да се засени револуцијата во Сирија и да се потиснат надежите на Сиријците, изјави денес турскиот претседател Реџеп Таип Ердоган, јавува Анадолу.
„Дури и ако Израел дејствува опортунистички, порано или подоцна ќе мора да се повлече од териториите што ги окупира“, рече Ердоган во обраќањето до нацијата по последниот состанок на Кабинетот годинава во главниот град Анкара, мислејќи на неодамнешното нелегално навлегување на Израел во Сирија.
Туркије застана на вистинската страна на историјата од самиот почеток на сириската криза во 2011 година, рече Ердоган.
Сириската револуција повторно го насочи глобалното внимание кон земјата, рече Ердоган, додавајќи дека како нејзин „сосед и брат“ Туркије најдобро ги разбира процесите во Сирија.
Истакнувајќи ја непоколебливата поддршка на Туркије за заштита на територијалниот интегритет и унитарната структура на Сирија, Ердоган рече: „Никогаш нема да отстапиме од ова“.
Анкара ќе ја обезбеди сета неопходна поддршка за сирискиот народ за „неговите достигнувања да бидат перманентни откако тој триумфираше над репресивниот режим“, рече Ердоган.
Во Сирија нема место за ниту една терористичка организација, вклучително и ДЕАШ и ПКК, предупреди Ердоган, додавајќи дека терористичката ПКК и нејзините ограноци или ќе се распуштат или ќе бидат елиминирани.
Турскиот претседател рече дека Анкара е решена да ги продолжи своите антитерористички операции во Сирија со „хируршка прецизност, без никаква штета за цивилите“.
Извор: Anadolu Agency (AA)
