АНКАРА (АА) – Претседателот на Република Туркије, Реџеп Таип Ердоган, вчера во Анкара изјави дека ќе продолжи борбата сѐ додека не се воспостави независна и суверена палестинска држава и дека во овој процес (на израелските напади врз Газа) победата ќе им припадне на Палестинците, јавува Анадолу.
Ердоган присуствуваше на „Турско-иранскиот бизнис-форум“ што се одржа во Претседателскиот комплекс во рамките на посетата на иранскиот претседател Ебрахим Раиси на Туркије.
Во текот на своето обраќање пред присутните Ердоган говореше и за израелските напади врз Појасот Газа.
„Во израелските напади врз нашите недолжни палестински браќа и сестри, убиени се 26.000 луѓе, главно деца и жени, а 65.000 се ранети. Жителите на Газа станаа жртви на злосторства кои ќе останат запаметени како срам во човечката историја. Во текот на овие напади сите ги видовме вистинските лица на оние кои со децении го подучуваат светот за човечките права и демократија“, истакна турскиот претседател.
Ердоган подвлече дека ќе се „продолжи со борбата сѐ додека не се воспостави независна и суверена палестинска држава, базирана врз границите од 1967 година, со Источен Ерусалим како главен град“ и додаде:
„Никогаш нема да ги оставиме нашите палестински браќа. Очекуваме сегашната израелска администрација, која се храни со крв и солзи, да воочи дека овој пат по кој одат не е вистинскиот пат и што поскоро да стави крај на нивните масакри. Како што претходно реков, оние кои се обидуваат да станат добри преку суровост ќе имаат ужасен крај. Во овој процес, победата ќе им припадне на нашите палестински браќа. Господ нека ги опкружи нашите палестински браќа со Неговата милост и поддршка.“
Ердоган во своето обраќање ги потсети присутните дека се собрале на 8. состанок на Советот за соработка на високо ниво меѓу Туркије и Иран.
Со желба форумот да биде од корист, за што верува дека дополнително ќе ја зајакне економската и трговската соработка меѓу Туркије и Иран, Ердоган рече дека се надева дека оваа активност ќе поттикне нови проекти, соработка и инвестиции во економските и трговските односи.
„Денес потпишавме 10 договори во различни полиња, а тие договори го зајакнаа правниот темел на нашите односи“, рече Ердоган и истакна:
„Затоа, Туркије и Иран, две големи регионални сили, дефинитивно мора да ја подобрат меѓусебната економска соработка заради просперитет, развој и стабилност. Во тој контекст, продолжуваме со нашата решеност да ја постигнеме трговската цел од 30 милијарди долари што претходно ја поставивме со Иран.“
Извор: Anadolu Agency (AA)
