ИСТАНБУЛ (АА) – Турскиот претседател Реџеп Таип Ердоган денес рече дека ниту една сила не може да ги натера жителите на Газа да ја напуштат својата вечна татковина, бидејќи Газа, Западниот Брег и Источен Ерусалим им припаѓаат на Палестинците, јавува Анадолу.
„Никој нема моќ да ги отстрани жителите на Газа од нивната вечна татковина, која постои илјадници години. Палестина, вклучувајќи ги Газа, Западниот Брег и Источен Ерусалим, им припаѓа на Палестинците“, изјави Ердоган за новинарите во Истанбул пред заминувањето во посета на Малезија.
Предлозите на американската администрација за Газа, дадени под притисок на ционистичкиот режим, не се вредни за дискусија, рече Ердоган, мислејќи на предлогот на американскиот претседател Доналд Трамп за преселување на Палестинците.
Ердоган, исто така, го пофали Хамас за исполнувањето на своите ветувања во тековната размена на затвореници со Израел, и покрај израелските обиди за поткопување на процесот.
Во однос на ситуацијата во Сирија, Ердоган рече дека со откривањето масовни гробници во различни делови на Сирија, се разоткрива крвавото лице на режимот на Асад.
Турскиот претседател изрази надеж за стабилност на Сирија под раководство на претседателот Ахмед ал-Шара, истакнувајќи дека земјата наскоро ќе најде мир.
Нема место за терористички организации во Сирија, рече Ердоган и додаде дека сирискиот претседател Ахмед ал-Шара ќе се бори против тие организации.
Извор: Anadolu Agency (AA)
