ИСТАНБУЛ (АА) – Турскиот претседател Реџеп Таип Ердоган гласаше во вториот круг од претседателските избори во таа земја на избирачко место во Истанбул, јавува Анадолу.
Актуелниот претседател Ердоган, кандидат на Народна алијанса предводена од Партијата за правда и развој (АК Партија), гласаше придружуван од неговата сопруга Емине Ердоган на избирачко место во училиште во областа Ускудар во Истанбул.
Ердоган по гласањето за новинарите изјави дека првпат во историјата на турската демократија се одржува втор круг од претседателски избори.
„Се разбира дека нема партии во вториот круг. Има само двајца кандидати и затоа верувам дека денешното гласање ќе биде многу брзо“, рече Ердоган, пофалувајќи ја високата излезност на изборите во Туркије.
„Во светот не постои држава во која излезноста достигнува 90 отсто. Туркије на најдобар начин ја покажа демократската зрелост со излезност до 90 отсто. Верувам дека и денес ќе биде исто така“, изјави тој.
Ердоган изрази желба изборите да бидат од корист за целата земја и граѓаните.
Избирачките места низ Туркије се отворени утрово во 8:00 часот по локално време (7:00 часот по средноевропско време), со што започна гласањето од вториот круг на претседателските избори во оваа земја.
Повеќе од 64 милиони граѓани на Туркије со право на глас во вториот круг избираат меѓу актуелниот претседател Реџеп Таип Ердоган, кандидат на Народна алијанса, и Кемал Киличдароглу, кандидат на опозициската Национална алијанса.
Во првиот круг од изборите, одржани на 14 мај, Ердоган освои 49,5 отсто од гласовите, а лидерот на турската опозиција Кемал Киличдароглу собра 44,89 отсто од гласовите. Народна алијанса на Ердоган, предводена од владејачката Партија за правда и развој (АК Партија), освои мнозинство во државниот Парламент во првиот круг.
Извор: www.aa.com.tr
