Министерството за енергетика, рударство и минерални суровини соопшти дека во земјава првпат се воведува методологија за енергетска сиромаштија, која ќе овозможи полесно препознавање на ранливите домаќинства и креирање мерки за нивна заштита.
„Добивме позитивен одговор од Секретаријатот на Енергетската Заедница за драфт-верзијата на методологијата за мерење на нивото на енергетска сиромаштија. Потврдено е дека документот е во согласност со европските стандарди и обврските од Директивата на ЕУ, која ги задолжува земјите да воспостават и објават критериуми за утврдување на енергетската сиромаштија,“ информираат од Министерството.
Методологијата ќе им даде на институциите јасна слика за обемот и структурата на енергетската сиромаштија и ќе биде основа за политики насочени кон домаќинствата кои најмногу се соочуваат со проблеми при обезбедување енергија. Дополнително, ќе придонесе за целосно усогласување со европските стандарди.
Од ресорот најавуваат и дека веќе се подготвува годишна програма за заштита на ранливите потрошувачи, во која методологијата ќе има клучна улога за дефинирање на приоритетите.
