КИТО (АА) – Полицијата во Еквадор приведе шестмина колумбиски државјани што се осомничени дека се поврзани со атентатот на еквадорскиот претседателски кандидат Фернандо Вилависенсио, пренесува Анадолу.
Вилависенсио беше убиен пред два дена во вооружен напад, а беше гласен поддржувач на борбата против корупцијата и кандидат на претседателските избори најавени во Еквадор за 20 август.
Новинската агенција АП јавува дека осомничените Колумбијци биле приведени во куќа во главниот град на Еквадор, Кито.
За време на рацијата им биле одземени возило и мотоцикл, како и оружје и муниција.
Министерот за внатрешни работи на Еквадор, Хуан Запата, го опиша нападот како политичко злосторство од терористичка природа, чија цел е саботирање на изборите.
Иако во полицискиот извештај нема информации дали приведените ѝ припаѓаат на некоја организација или не, Запата изјави дека осомничените се поврзани со организиран криминал.
