ИСТАНБУЛ (АА) – Египет објави дека почнува да формира логистички центар во Рафах за да ја олесни хуманитарната помош за Појасот Газа, кој е под напад и окупација од страна на Израел, пренесува Анадолу.
Гувернерот на Северен Синај во Египет, генерал-мајор Мухамед Абдулфадил, истакна дека центарот треба да биде изграден во пограничниот град, вклучувајќи го и граничниот премин Рафах меѓу Египет и Појасот Газа.
Абдулфадил нагласи дека египетската армија почнала да го гради центарот во Ал-Ариш за да ја олесни работата на египетската Црвена полумесечина и да го намали метежот во областа.
Според него, центарот ќе има паркинг места за камиони, безбедни магацини, административни канцеларии и сместување за возачи, како и објекти за вода и електрична енергија.
Тој додаде дека помошта за Газа стигнува до регионот Синај по копно, море и воздух, а се прават напори за транспорт на помош во Газа со камиони од пристаништето Ал-Ариш и меѓународниот аеродром Ал-Ариш.
– Засолниште за раселените Палестинци во Рафах
Рафах кој се наоѓа на јужната граница на Газа, беше дом на 280.000 Палестинци, пред Израел да почне да го напаѓа Појасот Газа.
Во нападите на 7 октомври се раселени 1,9 милиони луѓе во Газа, која има околу 2,3 милиони жители.
Поголемиот дел од раселените Палестинци побараа засолниште во Рафах, за кој Израел тврдеше дека е „безбеден“.
Со приливот на жители од северните региони, населението на Рафах се зголеми на повеќе од 1,4 милиони, над четири пати повеќе од нејзината оригинална големина.
Палестинците кои побараа засолниште во Рафах се борат да преживеат во импровизирани шаторски кампови поради недостаток на соодветни станови.
Израелските сили често го гаѓаат Рафах со воздушни напади. Постои загриженост дека доколку Израел изврши копнен напад врз Рафах, нема да има безбедно место за цивилите во Газа.
На 9 февруари Нетанјаху им наложи на армијата и безбедносните сили „да подготват план за напад на Рафах“.
Извор: Anadolu Agency (AA)
