Повеќе од една недела гори прилепската градска депонија кај селото Алинци. Со денови гаснат комуналците, пожарникарите, а на помош се и фирмите. Досега, сето е сведено на жаришта кои сѐ уште тлеат. Од прилепски „Комуналец“ велат дека намерно се пали депонијата.
– Во моментов гори стар отпад, од пред повеќе години. Секаков вид на отпад од индустриската зона. Се сомневаме дека човечкиот фактор е во прашање. Намерно подметнат пожар во депонијата. Голема е штетата. Особено за загадувањето и за здравјето. Опасност е за здравјето при и онака загадениот воздух, вели Рубин Абрашоски, директор на прилепското јавно-комунално претпријатие „Комуналец“.
Опозициската СДСМ од Прилеп за ситуацијата ги обвинува градските власти.
– За прилепскиот градоначалник Борче Јовчески и за ВМРО-ДПМНЕ, прилепчани немаат проблем со загадувањето, бидејќи мерните станици не покажуваат такво нешто. А, не покажуваат бидејќи нема мерни станици, рече на прес-конференција пред градската депонија Ивона Кузмановиќ од СДСМ од Прилеп.
Прилепската градска депонија се простира на околу 50 000 метри квадратни. Ова е вторпат за година и половина да гори депонијата и да не се знае кој ја пали, ниту кои се причините за тоа. Единственото решение се гледа во изградбата на регионална депонија за 19 општини во Југозападниот регион со седиште во општина Новаци.
Деновиве, во Прилеп стигна иницијативата на општината Новаци дека прифаќа на нејзино тло да се гради регионалната депонија. Ова треба да го верификува прилепскиот градски совет.
– Стигна иницијативата на општина Новаци дека се согласува седиштето на Регионалната депонија за Југозападниот регион да биде во Новаци. Сега треба прилепскиот градски совет да ја прифати иницијативата, да донесе одлука за тоа. Со тоа започнува процесот на формирање на јавно претпријатие – регионална депонија во општина Новаци, изјави директорот на ЈКП „Комуналец“, Рубин Абрашоски.
ИЗВОР: racin.mk
