Според податоците на Центарот за демократска транзиција на обработени 100% од гласовите, движењето на Милојко Спајиќ, Европа сега победи на изборите во Црна Гора освојувајќи 26% од вкупниот број гласови, или 24 мандати. Веднаш зад нив следува листата „Заедно“ на Демократската партија на социјалистите (ДПС) на Даниел Живковиќ со освоени 23% од гласвоите, односно 21 мандат. На трето место заврши коалицијата „За иднината на Црна Гора“ на Демократскиот фронт со освоени 15,1%, додека пак како четврт заврши коалицијата „Алекса и Дритан – Храбро се брои“ на поранешниот премеир Дритан Абазовиќ и Алекса Бечиќ кои освоија 13% од гласовите.
Изборите ги одбележа најниската излезност на гласачите од осамостојувањето на Црна Гора, а на овие избори граѓаните имаа можност да бираат меѓу 15 кандидатски листи за пратеници. Право на глас имаа 542 568 граѓани, а излезноста изнесува околу 55 отсто.
Ова се шести избори од независноста на државата од 2006 година.
Она што го очекуваат Црногорците е по три години политичка нестабилност и по пад на две влади, да добијат нова стабилна влада за наредните четири години која ќе го „одмрзне“ процесот на евроинтеграции, односно ќе го забрза членството на Црна Гора во ЕУ.
ИЗВОР: 360stepeni.mk
