ДУИ во Тетово ја обвинува општината за мобинг – Касами вели дека директорот на „Истибаг“ немал притисоци за да си даде оставка

Советниците на ДУИ во Тетово обвинуваат дека општина Тетово ги користи институциите за политичко пазарење. ДУИ во Тетово бара да преземат мерки бидејќи, како што велат, биле извршени уцени и мобинг врз поранешниот директор на ОУ „Истикбал“, Зија Адеми.

„Јавно го прашуваме градоначалникот на Тетово, во која улога го ангажирал Садат Сулимани во општина, како шеф на инспекторатот или како човек кој врши притисок врз вработените во образованието за да ги реализирате политичките договори со вашите коалициски партнери? Како смете училиштата и најважните функции на училиштата да ги гледате како работни места и да го смените кадарот кога на вас ке ви текне или кога така бара вашиот коалициски партнер“, порача Сали Елмази.

Градоначалникот на Тетово, Биљал Касами, ваквите обвинувања ги нарекува политички а додаде дека директорот немал притисоци и можел да не даде оставка.

„Воопшто нема притисок бидејќи директорот можеше да не поднесе оставка и тоа можел да го пријави и во министерство и министерството знаејќи дека и државниот инспекторат е во рамките на министерството, можеше да постапи по овој случај. Станува збор за класична политичка злоупотреба на ситуација која е оставка како и многу други оставки“, порача Биљал Касами.

Поранешниот директор на училиштето „Истикбал“ Зија Адеми вчера за ТВ21 изјави дека бил принуден да си поднесе оставка, а барањето му било упатено во име на градоначалникот на општина Тетово. По разрешувањето на Адеми, советот на родители и наставници испрати претставка до Министерството за образование, од каде бараат преземање мерки за овој случај.