Невропсихијатарот Мице Дудучки во Аргумент плус рече дека за да почне да функционира нашата држава потребни се реформи и промени кои ќе не вратат на старите етички норми. Според него, глобалната дијагноза на македонската нација е МАМА синдром.
„Јас ја поставив дијагнозата МАМА синдром тоа е акроним за малигни архитипски македонски мазохистички аутодеструктивизам. Знаеме што е малигно, нешто што е деструктивно нешто што го нагризува општественото ткиво во сите пори на неговото суштествување, архитипски изгледа како тоа да ни е вродено нам овде на Балканот и се пренесува генерациски. Мазохистички изгледа дека тоа е нешто што во нашата колективна свест постои и е од она турското наведната глава сабја не ја сече но јас велам дека наведнатата глава не видела сонце. Деструктивизмот се однесува на тоа дека ние самите на себе си сме најголеми непријатели, домашните криминалци не крадат, ние немаме како граѓани проблем ниту со Грција, ниту Бугарија ниту Албанија ниту Србија, ние самите на себе си сме најголеми неприојатели“, изјави Дудучки.
Според него, граѓанското општество треба да биде носител на сите промени и движења. Тој рече дека додека се занимаваме со историски лавиринти, потребно е да вложуваме во обраование, здравство и култура.
„Ако сакаме граѓанско општество, граѓанскиот сектор треба да биде носител на сите позитивни движења, ние имаме држава во која партиите одлучуваат за нашиот живот. Никој политичар ниту една држава не даваат пари туку тоа се наши пари, државата нема пари. Министерот по дефиниција треба да биде слуга на народот а кај нас е обратно. Политичарите треба да се плашат од народот а кај нас е обратно и тука ја имаме таа наведната глава и имаме неколку илјади луѓе кои се на платен список и не работат ништо па тоа една швајцарска економија не може да го издржи а не нашата и затоа се потребни реформи и промени“, рече Дудучки.
Тој додаде и дека во нашата држава се потребни реформи во судскиот систем.
Извор: 24vesti.mk
