Градежништвото продолжува со силно темпо, а Скопје повторно е во центарот на инвестицискиот бум. Во јуни во Македонија биле издадени 296 одобренија за градење, што е раст од 39 проценти во споредба со истиот месец минатата година. Вредноста на планираните градежни работи достигнува 6,36 милијарди денари, односно околу 103,5 милиони евра.
Најголема вредност на планираните инвестиции има токму во Скопскиот Регион. Таму се предвидени градежни работи вредни 3,48 милијарди денари, повеќе од половина од вкупната вредност на сите новоодобрени проекти во земјава во текот на јуни.
Од вкупно 296 издадени одобренија, 200 се однесуваат на високоградба, 26 на нискоградба, а 70 на реконструкција. Истовремено е предвидена изградба на 754 нови станови со вкупна корисна површина од 64.266 квадратни метри.
Најмногу се планираат станови со две и три соби. Од новопроектираните станови, 267 се двособни, 214 трособни, 116 четирисобни, 79 еднособни, а уште 33 се со пет соби.
Иако најголем број одобренија, вкупно 70, биле издадени во Полошкиот Регион, најголемата финансиска тежина на новото градење останува во Скопје. Тоа уште еднаш го потврдува силниот притисок за нова градба во главниот град, каде паралелно со новите станови со години се отвораат и прашањата за урбаното зеленило, сообраќајот, паркирањето и капацитетот на инфраструктурата.
Од вкупно 296 одобренија, 218 се за објекти каде инвеститори се физички лица, а 78 се издадени на деловни субјекти. Но компаниите стојат зад далеку поголеми инвестиции. Од вкупно 6,36 милијарди денари предвидени градежни работи, речиси пет милијарди денари се инвестиции на деловниот сектор, додека физичките лица учествуваат со околу 1,37 милијарди денари.
Податоците покажуваат дека станбената и другата високоградба остануваат еден од најактивните сегменти во домашната економија. Само за една година бројот на нови одобренија пораснал за речиси 40 проценти, а вредноста на планираното градење е зголемена за 31 процент.
За Скопје тоа значи продолжување на градежниот бум, но и дополнителен притисок врз градот во кој секоја нова зграда отвора и едно старо прашање, дали урбанистичкиот развој го следат доволно зеленило, паркинг, улици, училишта и друга инфраструктура.
Извор: zurnal.mk
