Дваесет патници на „Бритиш ервејс“ мораа да го напуштат летот од Фиренца до Лондон бидејќи авионот беше претежок за полетување.
Поради екстремната топлина од 35 степени, воздухот бил поредок, па на авионот му било потребно дополнително гориво, што го намалило бројот на патници што можеле да останат на летот.
„Пилотот рече дека луѓето морале да излезат поради екстремната топлина. Беше околу 35 степени и беше потребно дополнително гориво за моторот ефикасно да работи. Персоналот рече дека 36 лица ќе мора да го напуштат авионот, но на крајот околу 20 го сторија тоа“, рече еден патник.
Компанијата се извини и ги пренасочи патниците кон други летови.
„Поради кратката писта на аеродромот, екстремните температури влијаат на воздушниот притисок, па затоа тежината на авионот мора да се намали. Се извинуваме за непријатностите. Нашите тимови работат напорно за да ги донесат патниците до нивните дестинации што е можно побрзо“, изјави портпаролот на „Бритиш ервејс“.
Експертите предупредуваат дека поради климатските промени, ваквите проблеми ќе станат почести и дека летовите до јужна Европа би можеле да станат поскапи.
Извор: tv21
