ДОЊЕЦК (АА) – Нападите врз градот Вухледар во источниот украински регион Доњецк се интензивирани од 24 јануари, велат жителите на градот, јавува Анадолу.
„Тука ситуацијата е тешка. Тие (Русија) го напаѓаат градот. Ракетите паѓаат. Тие пукаат во нас. Од 24 јануари нападите почнаа да се засилуваат. Добро се сеќавам на тоа бидејќи 27 јануари беше мојот роденден“, изјави за Анадолу 43-годишниот Бохдан.
Тој рече дека се обидуваат да преживеат во опасна средина, во многу тешки услови, бидејќи конфликтот меѓу украинските и руските сили на тоа подрачје трае веќе една година.
Бохдан рече дека магацинот под станбената зграда станал негово засолниште, наведувајќи дека претходно го испратил своето семејство на безбедно место.
„Остануваме во засолништето. Се загреваме. Нападите се чести. Како да живееме дома? Гледате дека кога има напад куќата гори“, вели жител на Вухледар.
Еден војник во градот, наречен Ѕвер, за Анадолу изјави дека градот е под контрола на украинската Армија и дека така ќе остане.
Според неговите зборови, има само неколку метри меѓу руските позиции и украинските војници.
„Дури и сега, има само 500 метри од позицијата на непријателот до местото каде што сме“, рече војникот.
Владимир, војник од истата бригада, рече дека цивилната инфраструктура во градот е тешко оштетена поради интензивните напади и повтори дека Вухледар е под контрола на украинските сили.
Поминаа речиси 12 месеци откако Русија започна „специјална воена операција“ во Украина, а оттогаш, според Обединетите нации, најмалку 7.199 цивили се убиени, а 11.756 се ранети.
Извор: www.aa.com.tr
