Лоран Симонс (15) од
Белгија, познат како „малиот Ајнштајн“, официјално стана доктор по квантна
физика и е еден од најмладите доктори во светот. Тој во понеделник успешно ја
одбрани својата докторска теза на Универзитетот во Антверпен.
Иако
неговите достигнувања се веќе импресивни, Лоран од мали нозе има уште
поамбициозна цел – сака да го примени своето знаење од физика, медицина и
вештачка интелигенција за да ги истражува можностите за продолжување на
човечкиот живот, со крајна цел биолошка бесмртност.
Истражувања во полза на медицината
„По ова, почнувам да работам
на мојата цел – создавање супер-луѓе“, изјавил Лоран веднаш по одбраната на
докторската дисертација, јасно нагласувајќи дека неговите истражувања не служат
само за лични амбиции, туку и за добробит на човештвото.
Најновиот
успех претставува нов врв во кариерата што со години го фасцинира научниот свет
и започнала многу пред неговите тинејџерски години, пренесува Српска Инфо.
Лоран
во 2022 година, со само 12 години, ги заврши основните студии по физика на
Универзитетот во Антверпен, совладувајќи тригодишна програма за само 18 месеци.
Вообичаено, студентите на мастер студии имаат потреба од две години, но тој ги
завршил сите курсеви во првиот семестар, додека вториот го посветил на тезата и
праксата. Пред тоа ја завршил средното образование.
Веќе
тогаш го забележале големи компании и богати спонзори желни да ги поддржат
неговите научни амбиции. Родителите, Александар и Лидија, внимателно ги
одбивале раните понуди од технолошки гиганти од САД и Кина.
Нивниот
приоритет бил истражувањата на Лоран да бидат од корист за медицината – цел што
совршено се поклопува со неговите лични амбиции.
Запишал втора докторска програма
Лоран имал пракса во квантна
оптика на Институтот Макс Планк во Германија, каде што истражувал како физиката
може да се поврзе со медицината.
Темата
на неговата дисертација била „Бозе-поларони во суперфлуиди и супречврсти тела“,
истражување што се занимавало со аналогии помеѓу состојбите на бозоните и
црните дупки, проучувајќи Бозе-Ајнштајнов кондензат на ултрастудени
температури.
Сега,
како новопечен доктор по квантна физика, Лоран не планира да забави. Веднаш по
одбраната на докторатот се вратил во Минхен, каде што запишал втора докторска
програма од медицинските науки со фокус на вештачка интелигенција.
„Постојат
два Лорани – научникот и детето“, изјавил неговиот татко за медиумите во 2022
година.
Извор: vecer.mk
