Во вторникот вечерта, премиерот Мицкоски и лидерите на ВРЕДИ се сретнаа во Владата. Присутни беа лидерот на ДД, Изет Меџити, лидерот на Движењето Беса, Билал Касами, лидерот на Алтернативата, Зеќирја Ибрахими, но беше забележан и претседателот на Собранието, Африм Гаши. Од друга страна, покрај Мицкоски, на овој состанок присуствуваше и потпретседателот на ВМРО ДПМНЕ, вицепремиерот, Александар Николоски.
Немаше покана за медиумите, а немаше ниту изјави за тоа што се дискутираше.
Владини извори за медиумите велат дека средбата била конструктивна во пријателски и партнерски дух. Според она што беше соопштено, биле разгледани сите прашања за реформите, борбата против криминалот и промените во системот што ги оставиле ДУИ и СДСМ. Истакнаа дека разговорите продолжуваат за овие прашања.
Се обидовме да дознаеме детали од Премиерот, но тој не сакаше да открива многу.
Сите овие случувања следуваат откако Арбен Таравари кој веќе не е дел од ВРЕДИ, заедно со другите функционери на АА продолжуваат да бидат дел од извршната власт. Тројцата лидери на ВРЕДИ инсистираат дека АА не треба да биде дел од власта. За ова, вчера и денес, „преписките“ меѓу нив продолжија преку социјалните мрежи.
Синоќа од ВРЕДИ напиша дека непринципиелната политика на нејасни позиции каде не се знае кој е партнер, кој е сојузник, а кој е противник, заврши!
„Политиката не е ниту лов, ниту риболов. Но, постојат принципи и визија во постапувањето. Кој ги нема овие доблести, тешко да продолжи во ВРЕДИ. Затоа, оние што си заминаа го користеа ВРЕДИ како трамболина за да скокнат во скутот на Ахмети. Во обидот да го зголемат пазарењето, го зголемија нивниот срам и неуспех, го разоткрија нивното лицемерие и злоба. ВРЕДИ нема да дозволи ДУИ да се врати во оваа Влада, дури ни низ задната врата“, вели Вреди.
А денес, преку Фејсбук, генералниот секретар на АА, Блерант Рамадани, објави дека по средбата Таравари-Мицкоски, раководството на партијата го потврдило својот став на следниов начин:
„Алијансата не е политички декор, туку клучен фактор во управувањето со јасни принципи и одговорна визија. Алијансата за Албанците останува посветена на еднаквоста, чисти институции и држава што го почитува секој граѓанин. Овој пристап не е нов за нас, туку е дел од политичката ДНК на Алијансата за Албанците“, вели Блеранд Рамадани.
Средбата меѓу Мицкоски и Таравари се одржа еден ден пред средбата на Премиерот со лидерите на ВРЕДИ. По средбата, извори од АА за TВ21 изјавија дека средбата била многу пријателска и дека предлогот на Мицкоски бил уште еднаш да се обиде да се најде решение за меѓусебна поддршка меѓу владините партии на локалните избори, со посебни листи за советници.
ИЗВОР: ТВ 21
