Директорката на Козле, Каролина Симоновска преку соопштение во јавноста бара нејзиното име веќе да не се споменува во медиумите.
„Јас, д-р Каролина Симоновска, именувана за в.д. директор во ЈЗУ Универзитетска клиника за респираторни заболувања кај децата Козле-Скопје, под целосна материјална, професионална и морална одговорност, изјавувам дека не се согласувам и во ниеден случај не давам согласност моето име и презиме и професионалност да биде објавувано по медиуми. Особено во ниеден случај моето име и презиме и професионалност да бидат злоупотребувани на начин што неовластено и во контекст на невистинити објави ќе биде употребувано јавно по медиуми. Секоја постапка спротивна на горенаведеното претставува нарушување на мојот професионален, личен и морален интегритет и го задржувам правото да ги преземам сите законски мерки од секој обид на манипулација или неовластена употреба на моето име и презиме“, се вели во писмената изјава.
На ова реагираа и од Здружение на новинарите на Македонија – ЗНМ каде велат дека оваа забрана претставува јавен притисок насочен кон медиумите.
„Ваквите објави се директна цензура врз новинарите и ја поткопуваат слободата на изразување и независноста на медиумите. Ги потсетуваме сите носители на јавни функции дека, доколку имаат забелешки за објавени медиумски содржини, секогаш може да побараат исправка или демант. Исто така, на располагање им се и телата за саморегулација на медиумите, кои ја оценуваат етичноста и професионалноста на медиумските содржини. Оваа форма на јавни известувања е неприфатлива бидејќи создава атмосфера на заплашување и недоверба, што е спротивно на демократските вредности и јавниот интерес“, велат од ЗНМ.
Оваа изјава следува откако Лекарскиот колегиум на Клиниката „Козле“ преку протестно писмо побара итна оставка од Симоновска, поради нејзината одлука да ја разреши докторката Веселинка Митровска Јосифовска. Според нив, Симоновска се обидела насилно да ја отстрани од ординацијата, а за тоа има и сведоци. Бараат враќање на Митровска на работа и напоменуваат дека самоволието на директорката ја уништува клиниката и влијае на пациентите.
Министерот за здравство, Арбен Таравари, најави разгледување на работата на неколку директори, вклучувајќи ја Симоновска, која, како што изјави, ги нарече обвинувањата лаги. Лекарскиот колегиум повторно апелира до институциите за решавање на проблемот.
ИЗВОР: ТВ 21
