Андреа Рајзборо се придружи на екипата, а студиото веќе закажа премиера на 13 ноември 2026 година, потврди „Дедлајн“. Сценариото е напишано од Натаниел Халперн, додека продуцентка е Ема Вотс.
Нова адаптација на класикот на Дикенс
Класичната приказна од Чарлс Дикенс, за скржавиот богат човек кого го посетува духот на неговиот поранешен деловен партнер и духовите од минатото, сегашноста и иднината, доживеа бројни адаптации. Една од најпопуларните е анимираната адаптација од 2009 година во која Џим Кери го позајми својот глас.
Интересно е што ова е веќе втората адаптација на „Божиќна приказна“ објавена оваа година, откако „Ворнер Брос“ потврди во јули дека работи на адаптација што ќе ја режира Роберт Егерс, а во која глуми Вилем Дефо.
Верзијата на „Парамаунт“ е опишана како возбудлива приказна за духови сместена во Лондон на Дикенс, која го следи натприродното патување на еден човек додека се соочува со своето минато, сегашност и иднина во борба за втора шанса.
Голема улога за Џони Деп
Ова е една од најголемите улоги на Деп во поновата историја, по неговото судење за клевета во 2022 година. Актерот неодамна го заврши снимањето за „Дневен пијач“ на „Лајонсгејт“, во кој глуми покрај Пенелопе Круз.
Улогата на Скруџ совршено се вклопува во актерскиот репертоар на Деп, со оглед на тоа што ја изградил својата кариера врз незаборавни и ексцентрични ликови, од Капетанот Џек Спероу и Лудиот Шапкар до Икабод Крејн и Вили Вонка.
Прв голем студиски проект за Ти Вест
Режисерот Ти Вест се прослави во жанрот на хорор со својата трилогија на слешер за А24, која започна со „X“ од 2022 година, продолжи истата година со „Перл“ и заврши со минатогодишниот хит „MaXXXine“. „Ебенезер“ ќе биде неговиот прв голем студиски филм, а класичната приказна за духови совршено одговара на неговите режисерски афинитети. Извршни продуценти на филмот се Стивен Дојтерс и Џејсон Форман.
Извор: vecer.mk
