Инцидентот се случил во близина на Добој, во централниот дел на Босна и Херцеговина, а младиот човек, Мехмед Хасанамиџиќ, им подлегнал на повредите.
Според достапните информации, тој загинал вчера кога влегол во обележано минско поле.
-Тој ми беше сèе. Работеше, беше вреден. Се боревме заедно за корка леб. Одеше таму горе да се грижи за козите што често талкаат во минските полиња. Се обидуваше да ги врати. И тогаш нешто пукна, изјави за порталот „Аваз“ Ферида Хасанамиџиќ, мајка на починатото момче.
Семејството живеело во селото Хоџиќи, од кое Бошњаците биле протерани за време на војната, но многу семејства сепак одлучиле да се вратат.
Неколку други локални жители, исто така, биле убиени или сериозно повредени од мини претходно.
Според податоците од Центарот за деминирање на БиХ (MAC), од крајот на војната во БиХ од мини настрадале вкупно 1.781 лице, од кои 624 починале.
Загинале и 53 пиротехничари ангажирани во расчистување на мински полиња.
Повеќе од 800 квадратни километри од БиХ се уште се минирани, а се претпоставува дека таму има повеќе од 170 илјади мини.
Извор: vecer.mk
