ПАРИЗ (АА) – И во саботата вечер, петта ноќ по ред, Франција е поприште на протести поради полициското убиство на 17-годишно момче, а во повеќе градови избија нереди и судири меѓу полицијата и демонстрантите, вклучувајќи и групи на екстремната десница, известува Анадолу.
Снимките објавени на социјалните мрежи ги прикажуваат демонстрантите како палат возила и предизвикуваат пожари на разни локации низ Париз.
Демонстрантите испалуваа пиротехнички средства кон полицијата во Париз, палејќи ги барикадите во популарната населба Барб.
За спроведување на редот во Франција синоќа буле ангажирани 45.000 полицајци и припадници на жандармеријата, а полицијата повторно ја евакуираше култната авенија Шанзелизе во Париз.
Судирите меѓу полицијата и демонстрантите се водени во тесните улици во кои полицијата се обидуваше да спречи грабеж и вандализам.
Премиерката на Франција, Елизабет Борн, го посети кризниот центар во Париз, кој делува во рамките на Министерството за внатрешни работи.
„Дојдов тука да им ја потврдам својата целосна поддршка и поддршката на мојата влада. Вечерва 45.000 полицајци и припадници на жандармеријата, заедно со илјадници пожарникари, мобилизирани се да го штитат и одржуваат јавниот ред“, порача Борн.
Видеоснимките на социјалните мрежи прикажуваат хаотични сцени што се одвиваат во различни градови, меѓу кои се и Париз, Марсеј, Лион, Стразбур и Ница.
Во Стразбур, Рен и Венисје, маскирани демонстранти ја гаѓале полицијата со пиротехнички средства.
Марсеј исто така беше сведок на големи нереди, а полицијата наводно испалувала гумени куршуми со цел да ги сузбие протестите. Демонстрантите упаднале во продавница за автомобили и избегале со неколку возила, додека двајца полицајци се повредени од пиротехнички средства.
Францускиот телевизиски канал BFMTV објави дека неколку градоначалници побарале дополнителна помош од Владата за воспоставување на редот.
Министерот за внатрешни работи, Жералд Дарманин, изјави дека 427 лица се приведени низ Франција.
Од друга страна, локалните медиуми известуваат дека на улиците низ Франција излегле и екстремни десничарски групи и маскирани извеле напади врз демонстрантите во Анже и Шамбери.
Франција ја потресуваат протести откако Нахел М., по потекло од Африка, беше убиен од страна на полицијата вечерта на 27 јуни во париското предградие Нантер, бидејќи не запрел поради сообраќаен прекршок.
Приведени се близу 2.000 лица, додека повеќе од 200 полицајци се повредени од почетокот на протестите.
Обвинителството на Франција објави дека полицаецот кој го убил тинејџерот е обвинет за убиство со намера и сместен е во истражен затвор.
Извор: www.aa.com.tr
