Претставници на Македонците во Албанија, со отворени карти пред Сиљановска Давковка, најавуваат и ,,тет а тет“ средба со премиерот Мицкоски следната недела во Охрид.
Фалсификуваниот попис во Албанија е резултат на договор меѓу Тирана и Софија, вели Васил Стерјовски, претседателот на Македонската алијанса за европска интеграција од Албанија, за ТВ 24. Стерјовски кој денеска ја предводеше делегацијата на средбата во Вила Водно, вели дека отворено побарале поддршка но и правна помош од шефицата на државата.
– Нашата борба ќе биде во сите судски инстанци во Албанија и ако не победиме, спремни сме да одиме и во Стразбур. – вели Васил Стерјовски претседател на Македонската алијанса за европска интеграција од Република Албанија.
Ние за многу брзо ќе имаме средба и со премиерот Мицкоски. Ќе ги кажеме нашите сугестии како Македонија да помогне, за да опстојат Македонците во Албанија, затоа што ние како Македонци што живееме автохтоно на нашите територии, тие се едни од најзапоставените.
Според Стерјовски, потребно е долгорочно решение и национална стратегија, поддржана од сите македонски партии, вклучително и власта и опозицијата.
– Има повеќе работи што треба да се поддржат. Едно од нашите барања е Македонците во Албанија да добијат македонски државјанства. Затоа што поголемиот дел од Македонците немаат македонски државјанства. И не само тоа, туку да можат да земаат и лични карти. Како може, Бугарија да продава бугарски државјанства, им даваат фиктивна адреса и земаат лични карти. – вели Стерјовски.
Од кабинетот на шефицата на државата, пак, порачаа дека Сиљановска Давкова на средбата, ги поддржала напорите на претставниците на македонското малцинство во Албанија за унапредување на нивните права.
– Претседателката Сиљановска Давкова ја нагласи важноста на пописот, секогаш, без исклучок да ја отсликува реалноста во секое општество. – велат од Кабинетот на претседателка на Република Северна Македонија.
За резултатите од пописот во Албанија реагираше и македонското МНР, а во земјава на консултации беше повикан и амбасадорот Данчо Марковски.
Извор: 24vesti.mk
