ДЕБИТО НА АПЧЕВСКА „ПРОЛЕТНО ЧИСТЕЊЕ“ ПОДДРЖАНО СО 210.000 ЕВРА ОД ЕУРИМАЖ

„Пролетно чистење“, дебитантскиот игран филм на Марија Апчевска, е поддржан со 210.000 евра од паневропскиот филмски фонд Еуримаж. Филмот на Апчевска е меѓу 35 меѓународни копродукции, од кои пет документарци и две анимации, поддржани на јунската сесија на Еуримаж, со вкупно 10,7 милиони евра.

Меѓу поддржаните се и проектите на Лукас Донт, Павел Павликовски, Рјусуке Хамагучи, Мари Кројцер, Јонас Похер Расмусен и Раду Жуде, а 13 од филмовите се на режисерки.

По сценарио на Апчевска и Ереник Бекири, „Пролетно чистење“ во продукција на „Кино око“ доби 260.000 евра на конкурсот за филмски за 2022 во прв рок на одлучување на Агенцијата за филм. Копродукција е меѓу Македонија, Грција („Фрос продакшнс“), Словенија („Арсмедиа“) и Србија („Сервиа филм“). Во тек е кастинг за филмот, а снимањето е планирано подоцна во текот на годинава.

• ВЛЕГОВМЕ ВО ТРКАТА ЗА ЗЛАТНА ПАЛМА И ОСВОИВМЕ НЕОСВОИВА ТВРДИНА, ВЕЛИ ЕКИПАТА НА „СЕВЕРЕН ПОЛ“, ПРВИОТ МАКЕДОНСКИ ФИЛМ ШТО ЌЕ ИГРА ВО КАН

Краткиот „Северен пол“ на Апчевска е првиот македонски филм кој беше во конкуренција за Златна палма на Канскиот фестивал 2021.