Со години, бројката од 10.000 чекори дневно има скоро митски статус. Ја гледате на својот паметен часовник, ја слушате во здравствени совети, а можеби дури и ја користите како своја лична цел.
Но, интересен факт е дека оваа бројка не произлегла од научни истражувања, туку од маркетинг-кампања во Јапонија во 1960-тите години, со цел да се промовира продажбата на првите педометри.
Истражувачите денес конечно го поставија прашањето што многумина го мислеа: Дали навистина мора да правите 10.000 чекори дневно за да го подобрите здравјето, или е доволно и помал број за да се постигнат значајни ефекти врз телото, умот и долговечноста?
Оваа анализа е една од најобемните досега и нејзините наоди се поохрабрувачки од очекуваното.
Наместо да се фокусира само на една состојба, студијата ги анализирала врските меѓу бројот на чекори и ризикот од состојби како деменција, депресија, срцеви заболувања, рак, дијабетес тип 2, падови, па дури и прерана смрт.
Истражувањето опфатило возрасни луѓе од различна доба, здравствени состојби и животни навики. Бројот на чекори бил мерен објективно, преку уреди како акцелерометри и педометри, што го прави истражувањето понадежно од оние засновани на самопроцена. Потоа се следело како бројот на чекори влијае врз здравствените исходи со текот на времето.
Зошто 7.000 чекори би можеле да бидат доволни?
Во споредба со луѓе кои во просек правеле само 2.000 чекори дневно, оние што правеле 7.000 чекори дневно имале:
• 47% помал ризик од прерана смрт
• 38% помал ризик од деменција
• 25% помал ризик од срцеви заболувања
• 22% помал ризик од депресија
Дури и мало зголемување – од 2.000 на 4.000 чекори дневно – било поврзано со 36% намален ризик од прерана смрт.
Иако придобивките продолжуваат да растат со зголемување на бројот на чекори, по 10.000 чекори тие почнуваат да стагнираат. На пример, 12.000 чекори дневно го намалуваат ризикот од дијабетес за 27%, но најголем дел од придобивките веќе биле постигнати на 10.000 чекори.
Со други зборови, истражувањето покажува дека не мора опсесивно да се фокусирате на бројката од 10.000 чекори дневно за да го заштитите вашето здравје. За повеќето луѓе, околу 7.000 чекори дневно е реална и моќна цел што носи значителни придобивки.
Зошто секој чекор е важен?
Највпечатлив дел од оваа студија е потсетникот дека малите промени имаат големо значење.
Не морате веднаш да се трансформирате во маратонец. Кратки прошетки во текот на денот, одење додека зборувате на телефон, излегување на кафе, или долг круг околу вашиот домот – сето тоа има значајно влијание.
Ако сега правите околу 3.000 чекори дневно, зголемувањето на 5.000 или 6.000 чекори веќе значително го подобрува вашето здравје.
Податоците покажуваат дека и постепеното зголемување на активноста може да го намали ризикот од хронични болести и да го продолжи животниот век.
Извор: kurir.mk
