Славје во Газа, воздржаност во Израел. После 15 месеци жестоки борби на Блискиот Исток, Израел и Хамас постигнаа примирје.
Договорот, кој стапува на сила од недела, првично треба да доведе до ослободување на 33 израелски заложници во замена за 1.000 палестински затвореници и зголемена хуманитарна помош. Ќе трае во три фази а конечна цел е ослободување на сите заложници и повлекување на израелската армија од газа…
За палестинската организација, договорот преставува победа а појасот сега ќе влезе во нова фаза во која ќе следува целосна обнова на Газа.
“Договорот за прекин на огнот е резултат на отпорот на нашиот голем палестински народ и нашиот храбар отпор во Појасот Газа што трае повеќе од 15 месеци. Тоа исто така е потврда дека окупацијата не постигна ниту една од своите цели.“ – Хамас.
Од израелкската влада од каде велат дека официјалниот став на државата ќе го откријат дури откако ќе бидат потврдени сите детали од договорот. Иако за денеска беше планирана средба на безбедносниот кабинет, на кој требаше да го одобри договорот, состанокот е одложен а од кабинетот на Бенјамин Нетанјаху го обвинија Хамас дека се обидува да издејствува да добие повеќе од првично договореното.
„Спротивно на експлицитната клаузула која му дава на Израел право на вето за ослободување на масовните убијци кои се симболи на теророт, Хамас бара тие да одлучуваат за овие терористи. Премиерот му наложи на преговарачкиот тим да остане цврсто на претходно договорениот став и целосно да ги отфрли обидите за изнуда на Хамас во последен момент.“ – Влада на Израел.
Европските лидери го поздравија прекинот на огнот меѓу Израел и Хамас и побараа целосно спроведување на договорот…Според европските преставници, договорот меѓу двете страни е клучен за постигнување регионална стабилност но и неопходен чекор кон формирање на Палестинска држава во регионот.
„Ова носи надеж во целиот регион, каде што луѓето предолго трпат огромно страдање.“ – Урсула Вон дер Лајен претседател на Европската комисија.
Од Обединетите Нации велат дека сега откако е постигнато примирје, приоритет мора да биде ублажување на страдањето на населението.
„ОН се подготвени да го поддржат спроведувањето на овој договор и да ја зголемат испораката на хуманитарна помош за безбројните Палестинци кои продолжуваат да страдаат.“ – Антонио Гутереш генерален секретар на ОН.
Договорот за прекин на огнот во Газа го поздравија и саудиските власти кои побараа и целосно повлекување на Израел од палестинската територија уништена од 15-месечната војна.
Конфликтот меѓу двете страни избувна во октомври 2023 година, откако милитантите предводени од Хамас нападнаа населби на југот на Израел. Според израелската влада, во нападот убиени биле околу 1.200 луѓе, главно цивили а преку 250 лица беа земени како заложници.
Израел возврати со голема офанзива врз палестинската енклава во која беа убиени повеќе од 44.000 луѓе и беше раселен поголем дел од населението. Војната се прелеа и соседен Либан а Израелската армија во изминативе 15 месеци ги елиминираше првите луѓе на исламистичките групи Хамас и Хезболах.
Извор: 24vesti.mk
