Дачиќ: Србија не поддржува воведување санкции против Русија

Се залагавме против нарушувањето на територијалниот интегритет кога станува збор за Украина, Шпанија и Кипар, бидејќи тоа е нашиот основен принцип, кој важи и за Косово, рече Дачиќ

Српскиот шеф на дипломатијата Ивица Дачиќ изјави дека Белград смета дека е погрешно да се нарушува територијалниот интегритет на која било земја, но дека не го поддржува воведувањето рестриктивни мерки против Русија.

„Се залагавме против нарушувањето на територијалниот интегритет кога станува збор за Украина, Шпанија и Кипар, бидејќи тоа е нашиот основен принцип, кој важи и за Косово“,

изјави Дачиќ за новинарите по средбата со министерот за надворешни работи на Босна и Херцеговина, Елмедин Конаковиќ, јави агенцијата ФоНет.

Дачиќ рече дека претседателот Александар Вучиќ, во понеделник во Брисел, го очекува „ужасно тежок ден“ поради разговорите за Косово.

„Граѓаните и политичарите во Србија не се свесни за ситуацијата во која се наоѓаат Вучиќ и Белград“,

рече Дачиќ.

Тој изјави дека Вучиќ ги информирал меѓународните претставници дека нема да се согласи со признавање на независноста на Косово или со влез на Приштина во Обединетите нации.

„Заедницата на српските општини (ЗСО) на Косово не е тема за која повторно ќе се преговара, туку таа треба да се формира врз основа на Бриселскиот договор. Косовскиот премиер Албин Курти не ја споменува ЗСО, но нејзиното создавање мора да претходи на секој договор“,

изјави Дачиќ пред средбата во Брисел, каде ЕУ очекува Белград и Приштина да го прифатат договорот за Косово.

Српскиот претседател Александар Вучиќ и косовскиот премиер Албин Курти, и покрај противењето на некои делови и контурите на предложените решенија во француско-германскиот план за Косово, кој ЕУ го усвои како свој, го потврдија учеството во новата рунда дијалог.