АНКАРА (АА) – Турскиот министер за надворешни работи, Мевлут Чавушоглу, остро го осуди израелскиот упад во џамијата Ал Акса, јавува Анадолу.
Чавушоглу денес во Анкара го прими рускиот министер за надворешни работи, Сергеј Лавров.
Шефот на турската дипломатија на прес-конференција ги коментираше и упадите на израелските сили во џамијата Ал Акса.
„Однесувањето на израелската полиција е неприфатливо и нехумано. Палестина, џамијата Ал Акса и Ал Кудс се нашата црвена линија и никогаш нема да направиме отстапки за овие прашања“, рече Чавушоглу.
Тој потоа го повика Израел трајно да ги запре нападите врз Ал Акса и воздушните напади врз Појасот Газа.
Чавушоглу, исто така, рече дека би можел да одржи телефонски разговор со израелскиот министер подоцна во текот на денот за да ја изрази својата загриженост за неодамнешните израелски напади врз Палестинците.
Тензиите во регионот следуваа откако израелските сили упаднаа во комплексот на џамијата Ал Акса во окупираниот Источен Ал-Кудс/Ерусалим две ноќи по ред и насилно ги отстранија палестинските верници.
Чавушоглу се осврна и на последните случувања во контекст на војната меѓу Русија и Украина.
„Туркије е подготвена да даде поддршка за што поскоро завршување на војната меѓу Русија и Украина врз основа на меѓународното право“, рече тој.
Тој ја истакна и важноста на договорот за житото.
„Важно е да се обезбеди испорака на руски амонијак и ѓубриво. Договорот за жито помага во ублажувањето на глобалната криза со храна“, рече Чавушоглу.
Во јуни минатата година, Туркије, Обединетите нации, Русија и Украина потпишаа договор во Истанбул за продолжување на извозот на жито од три украински пристаништа на Црното Море, што беше суспендиран по почетокот на руско-украинската војна во февруари 2022 година. Благодарение на турските напори, договорот за жито беше продолжен за уште 120 дена во ноември минатата година и уште 60 дена во март годинава.
Тој ја коментираше и четирилатералната средба во руската престолнина Москва.
„Дијалогот треба да продолжи и би било корисно да се продолжат консултациите на ист начин“, рече Чавушоглу.
Тој додаде дека Анкара се надева дека дијалогот за Сирија ќе продолжи на „транспарентен и отворен“ начин.
Делегациите на Туркије, Русија, Иран и сирискиот режим на Башар ал Асад на 4 април го завршија дводневниот состанок во Москва и се договорија да продолжат со консултациите во врска со мировниот процес во Сирија.
Извор: www.aa.com.tr
