Опасни се обидите манипулативно да се претстават условите договорени и опишани во компромисот од 2022 година како некои нови барања на Република Бугарија, велат од бугарското МНР
Бугарија нема нови услови кон Северна Македонија. Напротив, таа искрено сака да го види својот сосед како напредува кон полноправно членство, преку успеси во реформскиот процес и напорите за градење добрососедски односи.
Ова е став на бугарското МНР објавен по, како што велат оттаму, многуте прашања од медиумите во врска со природата на европскиот компромис постигнат во 2022 година меѓу двете земји.
„Бугарија нема нови услови кон Северна Македонија. Напротив, таа искрено сака да го види својот сосед како напредува кон полноправно членство, преку успеси во реформскиот процес и напорите за градење добрососедски односи. Го очекуваме првиот чекор во овој процес, согласно обврските потпишани од Скопје во јули 2022 година – ‘…стапување во сила на измените на Уставот на Северна Македонија за граѓаните кои живеат на територијата на оваа земја и се дел од други народи, како што е бугарскиот народ, според внатрешните процедури’“,
се вели во соопштението на бугарското МНР.
Оттаму посочуваат дека договорите мора да се спроведуваат, без разлика дали се мултилатерални или билатерални, и дека неспроведување на веќе потпишаните договори ги поткопува довербата, конзистентноста и предвидливоста во односите меѓу државите и предизвикува одмазда.
„Од нашите пријатели во Северна Македонија секогаш очекуваме совесно исполнување на сите преземени обврски, а не обиди да се толкува дали процесот на европска интеграција бара нивно исполнување. Патот на Северна Македонија кон членството во ЕУ има јасно дефинирани параметри. Неодговорно и контрапродуктивно е да се нарушува тешката и деликатна рамнотежа со несоодветни и тенденциозни толкувања кои отстапуваат од критериумите јасно утврдени од Советот на ЕУ за оваа работа. Посебно опасни се обидите манипулативно да се претстават условите кои се веќе договорени и опишани во компромисот од 2022 година, како некои нови барања на Република Бугарија“,
пишува во соопштението.
За случајот со Пендиков, Бугарија потсетува дека вториот осомничен напаѓач сè уште не е уапсен и успешно бега од правдата, а првоосомничениот напаѓач го спречува спроведувањето на судските рочишта и побара да му биде вратен пасошот.
Во соопштението се вели дека Бугарија очекува Северна Македонија да докаже сериозност во гонењето на злосторствата од омраза врз Бугарите.
ИЗВОР: 360stepeni.mk
