Бугарските овчари ќе протестираат против македонското јагне

Според претседателот на Асоцијацијата на одгледувачи на овци и кози Симеон Караколев, бугарскиот пазар е компромитиран со увозот на 200 тони јагнешко месо од Македонија со цена под седум евра за килограм. Две недели пред Велигден трговската мрежа е преполнета со јагнешко месо увезено од Северна Македонија. Тоа е продукт што не е регулиран согласно европските барања за безбедност на храната, велат од Асоцијацијата

Националната асоцијација на одгледувачи на овци и кози од Бугарија најавува одржување протест поради неконтролираниот увоз на јагнешко месо од Северна Македонија.

Тие му пишале протестно писмо на бугарскиот министер за земјоделство Јавор Генчев во кое велат дека властите воопшто не се грижат за заштитата на бугарското јагне, како и за безбедноста на храната, а со тоа ја загрозуваат и безбедноста на нацијата.

„Две недели пред Велигден трговската мрежа е преполнета со јагнешко месо увезено од Северна Македонија. Тоа е продукт што не е регулиран согласно европските барања за безбедност на храната. Ако до 28 март не се издаде наредба за построга контрола од бугарската Агенција за храна и увозот на јагнешко месо да биде вршен со почитување на европските критериуми за безбедност на храната (салмонела, неовластени фуржани компоненти, неовластени антибиотици, вакцинација), на 30 март бугарските одгледувачи на овци и кози ќе го блокираат граничниот премин Кулата со цел да ги заштитиме нашите интереси и нашата егзистенција“,

пишува во протестното писмо во кое се предупредува на драстичното намалување на бројот на овци и кози што се одгледуваат.

Според претседателот на Асоцијацијата, Симеон Караколев, бугарскиот пазар е компромитиран со увозот на 200 тони јагнешко месо од Македонија со цена под седум евра за килограм.

„Ако тоа продолжи, над 50 илјади бугарски јагниња ќе останат непродадени, а тоа ќе биде нов удар за бугарската сточарска индустрија“,

вели Караколев.

В понеделник тие ќе имаат средба во ресорното министерство, а доколку не добијат цврсто ветување за итни мерки ќе ја реализираат својата најава за блокада на еден од граничните премини.