Бугарија децидна – преговарачката рамка останува иста, медијација не е потребна. Откако Виктор Орбан на масата стави предлог за решение со Софија – бугарските политичари, веќе трет ден, го штиклираат како неприфатлив. За политичката елита во Софија, европскиот договор е единственото решение за Македонија да ги продолжи преговорите со ЕУ.
Бугарскиот европратеник Ковачев, денеска, порача дека главната домашна задача на Македонија е да ја надмине омразата и фалсификувањето на историјата.
– Нема да се укине единствената преговарачка рамка за Република Северна Македонија, без разлика што Виктор Орбан ги нуди своите услуги да биде посредник во спорот со Бугарија. – Андреј Ковачев европратеник на ГЕРБ, за БНР.
Македонската влада да не се надева дека новата политичка влада во Бугарија ќе донесе промена на преговарачката рамка, сите партиите се единствени за македонското прашање, вели Љубомир Ќучуков, поранешниот заменик МНР на Бугарија за ТВ 24.
– Тоа е прашање меѓу Брисел и Скопје, а не меѓу Скопје и Софија. Веќе претходно има преговарачка рамка, утврдена и од двете страни, која едноставно треба да се исполнува.Кога зборуваме за билатерални односи, јас сметам дека сите канали се отворени за комуникација и за барање на поле за соработка. Се разбира, потребно е да има желба и од двете страни. И не сметам дека е потребно посредништво. – Љубомир Ќучуков директор на Институтот за економија и меѓународни односи и поранешен заменик МНР на Бугарија.
За македонските експерти, не е проблем, во уставот да бидат вметнат 3500 Бугари – проблем е негаторската политика на Софија.
– Јас очекувам, самата Европска унија, преговорите да ги врати онаму каде што и припаѓаат – во рамките на Копенхашките критериуми и во рамките на вредностите на Европската Унија или да обезбеди гаранција, дека ние нема да бидеме понатаму, на секој чекор, блокирани, со други вакви небулозни барања. – Самоил Малчески универзитетски професор.
Македонија на 19 јули 2022 година го започна првиот дел од првата меѓувладина конференција со ЕУ. Според усвоената преговарачка рамка, за да ги продолжи преговорите со Унијата, мора да ги вметне Бугарите во Уставот.
Извор: 24vesti.mk
