АТИНА (АА) – Бројот на загинати од минатонеделното потонување на рибарски брод преполн со мигранти недалеку од брегот на југозападна Грција се искачи на 82, а се стравува дека уште стотици мигранти се удавиле, пренесува Анадолу.
Телото на мигрант е пронајдено во подрачјето блиску до потонувањето, јави државната новинска агенција АМНА, додавајќи дека операциите за пребарување сѐ уште се во тек, а во нив учествуваат грчка фрегата, хеликоптер и авион.
Спасени се вкупно 104 луѓе, но бројот на загинати се очекува да расте бидејќи преживеаните велат дека бродот превезувал над 600 мигранти, главно од Пакистан, Египет и Сирија.
Според групите за човекови права, Грчката крајбрежна стража можно е да ги игнорирала СОС-сигналите од бродот, додека некои од преживеаните ги обвинија грчките власти дека се директно вклучени во несреќата.
Обвинителот во грчкиот град Каламата одлучи деветмина преживеани, наводно египетски државјани, приведени под сомнение дека се шверцери со луѓе, да останат во привремен притвор, јави државната телевизија ЕРТ, додавајќи дека сите тие ги отфрлиле обвиненијата и дека се изјасниле за невини.
Сепак, се наведува дека еден од нив посочил четворица други обвинети дека се шверцерите на луѓе.
Извор: www.aa.com.tr
