Борел: Дијалогот меѓу Белград и Приштина за нормализација на односите е во клучна фаза

ЕУ им претстави на страните предлог кој ќе го стави процесот на нормализација на солидна, напредна патека, вели Борел

Високиот претставник за надворешна и безбедносна политика на Европската унија, Жозеп Борел изјави дека дијалогот меѓу Белград и Приштина за нормализација на односите со поддршка на ЕУ е во клучна фаза.

Канцеларијата на Европската унија во Косово на Твитер соопшти дека Борел на денешната седница на Советот за безбедност на ОН посочил дека ЕУ доставила предлог до страните во дијалогот и додаде дека се надева оти тие ќе се ангажираат конструктивно на следниот состанок и ќе ги искористат можностите.

„Дијалогот меѓу Белград и Приштина за нормализација на односите, со поддршка на ЕУ, е во клучна фаза. ЕУ им претстави на страните предлог кој ќе го стави процесот на нормализација на солидна, напредна патека. Ќе бидам домаќин на двете страни во Брисел следната недела и се надевам дека тие ќе се ангажираат конструктивно и ќе ја искористат оваа единствена можност“,

рече Борел.

И специјалниот претставник на ЕУ за дијалогот Белград-Приштина Мирослав Лајчак изјави дека претстојниот состанок во Брисел, кој ќе се одржи на 27 февруари на највисоко политичко ниво, е значаен и оти следните чекори и прифаќање на предлозите поддржани од сите членки на ЕУ и САД зависеле од ставовите на партиите, пишува српски „Блиц“.

Лајчак потсетува дека од септември разговарале со претседателот на Србија, Александар Вучиќ и со премиерот на Косово, Албин Курти и дека еден од нив во јануари, а другиот во февруари рекол дека го прифатиле европскиот предлог во принцип.

„Сега е дојдено време тие официјално и јавно да го прифатат предлогот и потоа да разговараат за неговото спроведување. Важно е партиите формално и јавно да го прифатат и да се разговара за други детали“,

рече Лајчак.

Лајчак наведува дека доколку двете страни го отфрлат предлогот, тоа би испратило негативен сигнал дека не се подготвени да ги нормализираат односите и да одат по европски пат.

„Сите знаат што очекуваме од средбата, сите знаат каде стоиме“,

додава Лајчак.