Битола се збогува со летото на културата со големо финале на БитФест 2025. На 31 август, на платото пред Офицерски дом, публика ќе има можност да го доживее „Bitola Art Mapping“ – завршна видео-презентација која го претвора градскиот простор во светлосна сцена.
Фестивалот ова лето го потврди статусот на Битола како културен центар во регионот, со учество на светски уметници, локални приказни и програма на повеќе локации низ градот. Секоја вечер, публиката ја покажуваше силата на културата како препознатлив белег на градот.
Организаторите го гледаат финалето не само како завршување на фестивалското лето, туку и како можност за ново размислување: дали Битола може да стане домаќин на свој светлосен фестивал по примерот на светските метрополи како Лион, Берлин и Сиднеј. „Light festival“ е современ уметнички формат кој со светлина, проекции и мултимедијални инсталации ја трансформира архитектурата и јавниот простор во сцена.
Публиката е поканета да го доживее финалето и да размислува за иднината на Битола како град на светлина и култура.
