АНКАРА (АА) – Бројот на загинати од силниот земјотрес во Мјанмар се искачи на 3.471, додека тимовите за пребарување и спасување продолжуваат да пронаоѓаат уште тела, објавијa денес државните медиуми, пренесува Анадолу.
Во земјотресот со магнитуда од 7,7 степени што се случи на 28 март, повредени се 4.671 лице, а 214 се водат како исчезнати заклучно со вчера.
Околу 653 лица затрупани под урнатините на зградите беа спасени од локални и меѓународни спасувачки тимови, додека 682 тела беа извадени од урнатините.
Високиот претставник за хуманитарна помош на Обединетите нации (ОН), Том Флечер, кој се сретна со погодените во централниот град Мандалеј, лоциран во близина на епицентарот на земјотресот, ја опиша ситуацијата како „запрепастувачка“ и ја повика меѓународната заедница „да застане зад народот на Мјанмар“.
Хуманитарните организации стравуваат дека комбинацијата од обилни дождови и екстремна топлина може да предизвика појава на болести, вклучително и колера, за преживеаните кои кампуваат на отворено.
„Семејствата спијат до урнатините на своите домови додека телата на најблиските се извлекуваат од урнатините. Вистински страв од нови земјотреси“, напиша Флечер на X.
Во меѓувреме, железничката линија Јангон-Мандалај и Меѓународниот аеродром во Мандалеј се повторно отворени откако беа затворени поради штета предизвикана од земјотресот.
Потресите оштетија 60 насипи и 11 железнички мостови долж линијата Јангон-Мандалеј, како и изместување на пругите во одредени области.
Во соседен Тајланд, бројот на жртви од земјотресот се искачи на 24, а 77 лица се водат како исчезнати.
Извор: Anadolu Agency (AA)
