ЗВОРНИК (АА) – Во џамијата Кушлат кај Зворник денеска се одржа традиционалната петочна молитва (џума-намаз), каде хатиб беше хафизот Ахмед еф. Хускановиќ, главниот имам на Меџлисот на Исламската заедница на Тузла, јавува Анадолу.
Џамијата Кушлат, изградена кон средината на 15. век, се наоѓа на карпа висока 500 метри. Изградена е од османлиските војници веднаш по нивното пристигнување во Босна, и поради таа причина се смета за прва воена џамија во Босна и Херцеговина.
„Денеска, 25 август, клањавме џума-намаз во џамијата Кушлат или како што го нарекуваат ова место ‘гнездо на соколите’. Уште еднаш се потсетивме на нашата традиција и на добрите луѓе кои живееја на овие простори и кои ја изградија џамијата. Муфтијата д-р Вахид еф. Фазловиќ, Меџлисот на Исламската заедница во Зворник и џематот на Дрињача ми ја укажаа својата доверба и големата чест денес да бидам хатиб. Ме радува фактот што имаше голем број верници и тоа покажува колку џамијата е неопходна во животот на муслиманите. Ги поздравувам сите наши верници, но и нашите соседи со желба да живееме во мир. Секој нека верува во она што треба и мисли дека треба, но нашите деца треба да ги воспитуваме во мир и да воведеме ред кај нас, меѓу нас, во нашите семејства и нашето општество“, рече хафиз Ахмед еф. Хускановиќ.
Џамијата за време на агресијата во 1993 година беше запалена, а во својот изворен облик и на истото место е обновена во 2013 година. Од последната нејзина обнова продолжува традицијата од минатото, кога последниот петок во август се клањал џума-намазот, а во последните неколку години е практика во оваа џамија да се одржи по една петочна молитва и за време на месецот Рамазан.
