Енигмата како Артан Груби заминал од Македонија стана и политичко и правно прашање.
И власта и опозицијата бараат од Министерството за внатрешни работи да даде јасен одговор како е можно поранешниот вицепремиер Артан Груби да ја напушти Македонија и да замине во Косово.
По тој повод, се огласи професорот Гордан Калајџиев, кој вели дека не било возможно Груби да биде уапсен на границата со Косово.
„Груби не можел да биде приведен при преминување на границата без судска одлука. Полициските мерки како “стоп листа” или распис се во спротивност со Уставот и ЗКП!“
Во јавноста се повеќе се изразува незадоволството кај граѓаните зошто тој не бил уапсен на граница со Косово кога ја напуштал државата.
Вчера, МВР соопшти дека се преземени дисциплински мерки за двајца полициски службеници од граничниот премин „Долно Блаце“ во врска со преминувањето на Артан Груби на државната граница. Едниот, полицискиот службеник Б.Ј., според МВР, со своето несовесно работење не извршил адекватни проверки на патничкото возило „мерцедес“ со кое се превезувал Груби и не го евидентирал за остварување излез од државата. Патниците од предметното возило, А.П. со дипломатска патна исправа како возач и А.Г. со македонска патна исправа како совозач, полицискиот службеник Б.Ј. ги завел дека пешки ја поминале границата.
Вториот полицискиот службеник кој добил дисциплинска мерка, е раководителот на смена Б.А.
Како што информира МВР, Б.Ј. е воедно суспендиран до завршување на дисциплинската постапка.
ИЗВОР: racin.mk
